Таҷлили Рӯзи Парчами  давлатӣ дар Донишгоҳи байналмилалии забонҳои хориҷии Тоҷикистон ба номи Сотим Улуғзода бо ҳузури профессор, узви пайвастаи АМИТ Кароматулло Олимов ва муовини раиси Кумитаи кор бо занон ва оилаи назди Ҳукумати Ҷумҳурии Тоҷикистон Абдулмаинзода Зарина баргузор гардид.

Дар  оғози  ҳамоиш муовини ректор оид ба илм ва инноватсияи Донишгоҳ номзади илмҳои филологӣ, дотсент Бахтиёр Абдураҳимзода баромад намуда, парчамро рамзи давлатдории миллӣ, соҳибихтиёрӣ, ваҳдат ва бахту саодати миллат номид. Боиси хушбахтӣ аст, ки бо шарофати ташаббусҳо ва иқдомҳои башардӯстонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон миллату давлати тоҷикон дар олам муаррифӣ мегардад. Аз  кору пайкори Пешвои ҷавондӯсти кишвар ҷавонони тоҷик неру гирифта, парчами Тоҷикистонро дар олимпиадаҳои фаннӣ, мусобиқаҳои варзишӣ ва  чорабиниҳои фарҳангии сатҳи байналмилалӣ баланд мебардоранд.

Кароматулло Олимов  профессор узви пайвастаи АМИТ  дар суханронии худ   ҳозиринро ба гузаштаи   тираю торик ҷалб намуда, он замонро сабақи  хуби зиндагӣ унвон кард. дар рафти суҳбат  ҷавононро барои таълими дуруст гирифтан, вақтро самаранок истифода намудан, барои бедории миллӣ, зиракии сиёсӣ ва пайваста меҳнат кардан  даъват  намуд. Аз шароитҳо ва ғамхориҳои рузафзуни Роҳбари ҷавонпарвари худ хуб истифода намоед  ва ба боварию эътимодашон сазоврр бошед илова намуд Кароматулло Олимов.

Муовини  раиси Кумитаи кор бо занон ва оилаи назди Ҳукумати Ҷумҳурии Тоҷикистон Абдулмаинзода Зарина дар аснои суҳбат изҳори хушнудӣ намуд, ки занону бонувони тоҷик мақому манзалати аслии худро баъди ба даст овардани Истиқлоляити давлатӣ хусусан, бо дастгириҳои бевоситаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ  Раҳмон дарёфтанд. Аз ин рӯ,  аз шароити фароҳамомада самаранок истифода намуда, дар баробари тарбияи фарзанд дар тарғиб ва муаррифии  фарҳанги миллӣ, эҳёи анъанаҳои миллӣ, омода кардани кадрҳои лаёқатманд саҳм мегузоранд. Имрӯз дар ҷомеа нест самту соҳае, ки бонувони  тоҷик дар  он ҷо фаъолияти назаррас надошта бошанд. Дар мусобиқаҳои варзишӣ дар қатори ҷавонмардон низ кушиш менамоянд, ки парчамбардори миллат бошанд.

Дар фарҷоми қисми аввали ҳамоиш Раёсати Донишгоҳ чун рамзи эҳтиром   меҳмононро бо туҳфаҳои хотирмон қадрдонӣ намуданд.

Ҳамчунин як қатор ҷавонони фаъол, ки дар олимпиадаи байналмилалии “Khimio-2025” вазифаи волонтиёрӣ ва тарҷумони ҷавонро иҷро намуданд  бо сертификати Вазорати маориф ва илми Ҷумҳурии Тоҷикистон ва  сипосномаи Донишгоҳ қадрдонӣ карданд.

Чун ҳамеша қисми фарҳангии ҳамоишро дастаи ҳунарии “Субҳи ҷавонии мо” ҳусни идона бахшид.